من ورا الشبابيك

الشباك الأولاني

عجزت ليه فجأه وشعري شاب

ده انا قلبي لسه صغار وم اللي شافه ما داب

لساه عمال يحب وعن الهوي ما تاب

عايش حموت علي كده

عجوز بقلب شباب

الشباك التاني

لجسدي انا بصيت
ما شفت إلا عنيّه

بتبص ليه قُدام
ومش بتدور حواليّه

سألته رد عليّه..

حتلف عنيك وتدور
وانت وراها تدور

يا تلاقي نفسك دايخ
يا تكعبلك رجليّه

الشباك التالت

وانا ع التراب ساير
لقتني تايه وحاير

انا ع التراب ماشي
ولّا ف حشاه غاير

يا تراب انا مش عليك بدوس
بمشي عليك لكن
مداسي يبوس

اٍرحمني يوم دفنتي
و صّي عليّه السوس

ده عضمي فيّه اتنحل
ولكل مِن حواليّه
أصبح عشا وغموس

الشباك الرابع

أنا زي نحلة طرت من زهره ولزهره

لما لرحيقها وصلت بصمت بالعشرة

مهما خرج عسلي بألف طعم ولون

أنا برضه ف الآخر

إسمي يا دوب حشرة

شباك نمرة خمسة

فيه ناس ف دم ولحم تنهش زي الوحوش

وناس تقف تتفرج بدل ما تيجي تحوش

وناس تبيع السم وتذوقه بنقوش

وناس تقول الكدب وفيه تعيش وتبوش

وف وسط ده كله تلقي..

وش يقابلك بشوش